काठमाडौँ । सरकारले मंसिर १६ गते स्थानीय तहको उपनिर्वाचन गर्ने निर्णय गरेको छ । मन्त्रिपरिषद् बैठकले मंसिर १६ गते उपनिर्वाचन गर्ने निर्णय गरेको हो ।
मन्त्रिपरिषद् बैठक आइतबार बसेको थियो। सात प्रदेशका विभिन्न स्थानीय तहका ३९ स्थानमा रिक्त पदका लागि निर्वाचन गर्न लागेको हो ।
स्थानीय तहमा हाल रिक्त जिल्ला समन्वय समितिका दुई प्रमुखका लागि पनि उपनिर्वाचन हुन लागेको हो।
निर्वाचन आयोगले आजै आगामी मंसिर १६ गते स्थानीय तहको उपनिर्वाचन गर्न सरकारलाई प्रस्ताव गरेको थियो ।
निर्वाचन आयोगका अनुसार मोरङको ग्रामथान गाउँपालिका र दैलेखको महाबु गाउँपालिका अध्यक्ष तथा काठमाडौंको किर्तिपुर नगरपालिकाको प्रमुख पद रिक्त छ, रिक्त रहेका सबै स्थानमा निर्वाचनका लागि प्रस्ताव गरिएको थियो ।
प्रधानमन्त्रीले निर्वाचनलाई निष्पक्ष र शान्तिपूर्ण ढंगले सम्पन्न गर्ने वातावरण बनाउन आग्रह गरेका थिए।